جسر: متابعات:
هاجمت الفنانة السورية تولين البكري، كل من تناول بالانتقاد والسخرية الناس الذين خرجوا إلى الشوارع بعد حظر، من أجل شراء احتياجاتهم، ووصفوهم بالقطيع.
وقالت البكري في منشور على صفحتها في “فيس بوك”: “كلمتين واللي بده يزعل يزعل، هي الناس اللي نازلة طج بوستات عن القطيع اللي فلت بالشوارع، اليوم، بحب قلهم خليكم بمدينتكم الفاضل، وتركوا الناس بهمها”.
وبررت البكري نزول الناس للشارع بقولها “هي الناس اللي نزلت اليوم صرلها شهر محجورة ببيتها، بدون شغل، وبدون دخل، وبدون ما حدا يقلها شو لازمك”.
وأضافت “ما نزل (هالقطيع) ليتسيرن ولا نزل وخاطر بصحته لأنه جاهل، نزل لأنه مجبور، نزل لأنه سمان حارتهم صار بده يجمع ملايين من الحجر، نزل ليشتري طبخة من سوق الهال أرخص بمئة ليرة ليوفرها لأولاده، أو نزل ليدور على رزقة يطعمي ولاده منها”.
وانتقدت البكري غلاء الأسعار بقولها “لما كيلو الليمون بيصير سعره 2500 ليرة ،لا تسأل ليش نزل (القطيع) عالشارع،
لما كيلو اللحمة سعره 12000 وكيلو الدجاج 2500 والزيت والسمنة والسكر والرز والبرغل والبصل بحلقوا للسما، لا تسأل ليش نزل (القطيع) عالشارع”.
واعتبرت البكري أن من هاجم المعتصمين هم من المرفهين، مستشهدة بقول ملكة فرنسا ماري انطوانيت التي عندما علمت أن شعبها لا يأكل الخبز، قالت: فليأكلوا بسكويت!”.
وأضافت البكري “هي الناس مافيها تاكل بسكويت، هي الناس بدها تاكل خبز من خبز الحكومة، ولو مفتفت، مو محبة فيه بس لأنه حق الربطة 50 ليرة، حلوا عن كتف هالناس وارحموها شوي”.
ووجهت البكري رسالة إلى من هاجم الناس بالقول “ولكل حدا بيوصف هالناس بكلمة (قطيع) بحب قله كلمتين،
هاد القطيع هو أهلك وناسك وأولاد بلدك اللي بلاهم انت مابتسوى حق الكهربا اللي صرفتها عالنت، وانت عم تتفزلك بمنشورك، استحوا ولووو”.